Job 4

Elifazi Anazungumza: Ayubu Ametenda Dhambi

1 ^aNdipo Elifazi Mtemani akajibu:
2 ^b“Kama mtu akithubutu kuzungumza nawe,
kutakukasirisha?
Lakini ni nani awezaye
kujizuia asiseme?

3 ^cFikiri jinsi ambavyo umewafundisha watu wengi,
jinsi ambavyo umeitia nguvu
mikono iliyokuwa dhaifu.

4 ^dManeno yako yamewategemeza wale waliojikwaa;
umeyatia nguvu magoti yaliyokuwa dhaifu.

5 ^eLakini sasa hii taabu imekujia wewe,
nawe unashuka moyo;
imekupiga wewe,
nawe unafadhaika.

6 ^fJe, kumcha Mungu kwako hakupaswi kuwa
ndiyo matumaini yako
na njia zako kutokuwa na lawama
ndilo taraja lako?

7 ^g“Fikiri sasa: Ni mtu yupi asiye na hatia ambaye aliwahi kuangamia?
Ni wapi wanyofu waliwahi kuangamizwa?

8 ^hKwa jinsi ambavyo mimi nimechunguza,
wale walimao ubaya
na wale hupanda uovu,
huvuna hayo hayo hayo.

9 ⁱKwa pumzi ya Mungu huangamizwa;
kwa mshindo wa hasira zake huangamia.

10 ^jSimba anaweza kunguruma na kukoroma,
lakini bado meno ya simba mkubwa huvunjika.

11 ^kSimba anaweza kuangamia kwa kukosa mawindo,
nao wana wa simba jike hutawanyika.

12 ^l“Neno lililetwa kwangu kwa siri,
masikio yangu yakasikia mnong’ono wake.

13 ^mKatikati ya ndoto za kutia wasiwasi wakati wa usiku,
hapo usingizi mzito uwapatapo wanadamu,

14 ⁿhofu na kutetemeka kulinishika
na kufanya mifupa yangu yote itetemeke.

15 ^oKuna roho aliyepita mbele ya uso wangu,
nazo nywele za mwili wangu zikasimama.

16 ^pYule roho akasimama,
lakini sikuweza kutambua kilikuwa kitu gani.
Umbo fulani lilisimama mbele ya macho yangu,
kukawa na ukimya kisha nikasikia sauti:

17 ^q‘Je, binadamu aweza kuwa mwadilifu kuliko Mungu?
Je, mtu aweza kuwa safi kuliko Muumba wake?

18 ^rKama Mungu hawaamini watumishi wake,
kama yeye huwalaumu malaika zake kwa kukosea,

19 ^sni mara ngapi zaidi wale waishio katika nyumba
za udongo wa mfinyanzi,
ambazo misingi yake ipo mavumbini,
ambao wamepondwa kama nondo!

20 ^tKati ya mawio na machweo
huvunjwa vipande vipande;
bila yeyote kutambua,
huangamia milele.

21 ^uJe, kamba za hema yao hazikung’olewa,
hivyo hufa bila hekima?’